कोरोना

जिमि दाजु दीर्घरोगी । तःदँ न्ह्यःनिसें उसाँय् मदयाच्वंम्ह मधुमेह, उच्चरक्तचाप, जँलास्येँ, नुगःया ल्वय्या हुनिं व पाटन अस्पतालय् वाःया निकः आइतवाः व बुधवाः डाइलोसिस यानाच्वंम्ह । ०७७ भाद्र २ गते टिचिङ्ग अस्पतालय् कोरोना परीक्षण याःगु इलय् नेगेटिभ लिच्वः गःगु खः तर पाटन अस्पतालय् ०७७ भाद्र १६ गते डाइलोसिस याकः वंम्हेसित कोरोना परीक्षण मयासें डाइलोसिस याय् मखु धकाः मयासे कोरोना परीक्षणया निंतिं स्वाव जक कयाः लित छ्वया हल । २० गते न्हिनय् ५ बजे जिमि दाजुं थुगु लोक त्वःताः परलोक जुया दिल । परलोक जूगु ४ घण्टा लिपा उखुनु हे बहनि ९ बजे कोरोना पोजेटिभ जूगु रिपोर्ट वल । अले जिमि दाजुया सीम्ह धाःसा कन्हेखुन्हु न्हिनय् ४ः५० बजे थ्यंमथ्यं २४ घण्टा लिपा तिनि काः वल । थपाय् हाकगु ई छुकिया नितिं ?
जिमि दाजु मदय्काः जिमि काय्चां गुथियार धाः वन । गुथियार दाजुं बहनि दिपय् मवनेगु व कन्हय् सुथ न्हापां गुथियार दाजुपिं वयेगु बचं बियादिल । जिं नं जिमि काय्चायात अथेहे सल्लाह बिया । काय्चा नं कन्हय् सुथय् जक हे थः अबु यागु सद्गत याय्गु मनय् तयाः छेँय् लिहाँ वन ।
२० गते बहनी हे जिमि दाजुया सीम्ह उथय् जूगु जुसा थुकें कोरोना संक्रमनया गजागु रुप काइगु ज्वी ।
कोरोना प्रमाणित ज्वी धुंकाः नं सिम्हेसित २४ घण्टा छें तुं तया तय् माःबलय् परिवारया मन गथेजक तल ज्वी व छेँजःयात गजागु तनाव जुल ज्वी । छेँया हामा मदुगु उकिसनं कोरोना पोजितिभ रिपोर्ट २४ घण्टा छें तुं तयातये माःगु थौं जितः व खँ लुमनेवं म्ह हे मूहाः ।
सरकारपाखें कोरोना संक्रमित सीम्ह ब्यवस्थापन याइबलय् छेँजःपिंसं याय् मागु ज्या ः
१) प्लाष्टिकं सिम्हेसित प्लाष्टिक ¥यापिङ्ग यायेगु ।
२) चेन ब्याग कया हया थपिंसं हे ब्यागय् दुने सीम्ह स्वथनाः ठिक्क याना तयेगु । ता कि सेनात सीम्ह काः वइबलय् सेनाया जवानतय्त कोरोना सरय् मज्वीमा व थःपिंसं छु ंहे याये म्वाःलेमा । थ्व गजागु किसिमयागु सरकारया ग्वाहालि खः ?
जबकि सु नं मनूयात कोरोना जूगु प्रमाणित जुल कि मेम्ह मनूयात कोरोना सरय् मज्वीमा धका कोरोना संक्रमितपाखें तापाक च्वनेमाः धकाः सरकारं हे धयाच्वंगु दु ।
थथे फुकं ज्याखँ छेँजःपिसं हे याय् माःगु खःसा चन्द्रमाय् वनीपिं थें च्वंक लं फिना वयाः सिम्ह जक ल्ह्वना यंकाया छु मतलब जुल ।
थ्व फुक खँयात लुमंकेबलय् झीथाय् देशय् कोरोनाया माहामारी नाटक जक खः ला धै थें च्वं । धात्थें हे कोरोनाया माहामारि हे खः धैगु जूसा सरकारं थुके तसकं हे लापरवाहि यानाच्वंगु दु ।
थथे हे दक्व फुक्क छेँजःपिंसं हे याये माःगु खःसा ला सीम्ह ब्यवस्थापनं थःपिसं हे याःसां जिल । ताकि अन झीगु फुकं संस्कार त छ्यले फइ । थ्व कोरोनाया ख्याच्वः बियाः झीगु फुकं संस्कार संस्कृतिं बञ्चित याना होलिवाइन संस्कृति छ्यका तल झीत ।
मनू सी धुंकाः १३ न्हु तक याये माःगु गुगु संस्कार खः थ्व छुं नं छें च्वना याये फैगु अवस्था मखना ।
१) दु ब्यंकेगु (सं चायेत लुसि ध्यनेत नौ नौनि वइमखु)
२) घःसु यायेगु (घःसु यायेत गुर्जु वइमखु)
३) १३ न्हुया सराद्ध (१३ न्हु लत्या) यानाः बारय् याना तयागु छुं छुं फुकय् याना छ्वयेगु व मेमेगु । (गुर्जु वइमखु)