सकलें थः जुइमखु

म्वः म्वः मनूत दु । नाराचां थररर खाःगु ल्हातं तुतां चुयाः थःगु हे छेँ न्ह्यःने मिखां ख्वबि धररर हाय्काः च्वनाच्वन । वं सुयागुं हे ख्वाः स्वय् मफु । केवल थम्हंथःत चिनाः सान्त्वना बियाच्वन ।
म्हिग तक गुलि सान नक्सां थ्व छेँ न्ह्यःने च्वनाः फुइँ यानाजुइम्ह नारां थौं छु जुल धकाः मनूत खँ सिइकेगु लागि नाराचिया ख्वालय् तुंक स्वयाः मिखां न्ह्यसः छुनाच्वन । छगू फौज पुलिस वयाः वया लुखाय् तालं ग्वयाच्वन ।
नारांचां केवल म्हय् च्वंगु लं जक स्वया खालि मिखाय् ख्वबि हाय्का च्वन । कलाः, मचाखाचा गन दु वं छुं हे मसिल । कलाःम्ह तक्वः मछि क्वातु क्वानाः धाःगु नं खः तर वया उबले मिखां छुं हे मखं । छगू तल्लाय् च्याकु च्याकु कोठा दुगु प्यंगु तल्लाया छेँ छगू जक तल्ला थःत तयाः मेगु दक्व बांला बियाः महिनाय् लाखौ दुकानाः नयाच्वंम्ह । जि थें विद्वानम्ह सुं मदु धकाः फुइँ याना जुइम्ह ।
बालं ततं यक्व गांया मनूत म्हसिइ धुंकूम्ह । गनं चाहिउ वंसां धेबा फुके म्वाय्क चाहिला वइ । त्वालय्च्वंपिन्त थःगु बाखं कना जुइ ।
छन्हु नेपाल सरकार मालपोत विभागया हाकिम छम्ह बालं च्वं वल । विस्तार बिस्तारं निम्ह पासा जुल । बहनि जुल कि ब्राण्ड ब्राण्डया अय्लाः ज्वनाः वइ । गबलें छु सितन गबलें छु सितन ज्वनाः घरपति नापं अय्लाः त्वनाः गफ सफ यायां नारांचित व हाकिम थः हे मनूत थें ताया वल । काय्नं धाःगु सिबे वं धाःगु हे सही तायावल ।
छन्हु छगू भ्वं ज्वनाः वया बुँ छकू न्याय्माःगु जिगु नामय् न्यात कि अफिसय् बबाल खँ जुइ अथे जुयाः छिगु नामय् न्याय् माल धकाः धाः वल ।
नारांचिया तुति भुमिइ मदु । थ काय्पिन्सं छुं मयाः बालं च्वंम्हेस्यां थुलि जितः विश्वास यात धकाः । तक्वः मछि त्वाःबाःयापिन्त धयाच्वन ।
मेगु इलय् नं छगु भ्वं ज्वना वल । भतिचा धेबाः बैकं काय्मागु याकनं पुले फइगुलिं घरपति बाःया ग्वाहालि माल धकाः धाल । थय्क बिचाःयात जित थुलि बिश्वास याःम्हेसित जिं थुलि नं विश्वास याय् मजिइला धकाः मनय् तल ।
धाय्त ला कलाःम्हेसिनं धागु खः । कलाम्हं काय्पिंके सल्लाह यानाः जक ज्या या धकाः तक्व मछि क्वातु नं क्वाःगु खः ।
उबले माखा हाल कि छेँ स्यनी उकिं छ सुम्क च्वं धकाः कलाम्हेसित न्वाना छ्वत । हाकिमं धाःगु छु जुयाच्वन ले धाय्बलय् घरपतिया छेँ धितो तयाः छुं लख धेबा ऋण काय्गु खँ जुल । भतिचा लख व नं याकन पुलेगु धाः बलय् नारांचां बिचाः यात जिं नं थ्वयात विश्वास याय्माः ।
अले का सा का भ्वं दय्का हजि जिं साइन यानाः बिइ धका बचं बिल ।
काय्पिन्स नं थ्व खँ सिइकाः बौम्हेसित सम्झे याय्त स्वःगु खः । तर ज्वय्ज्वय्पियाः मिखा कनाः ब्वः बिउगुलिं काय्पिं नं चेते जुल । का बाः नं स्वया धकाः थःथःगु ज्याय् वन ।
ट्याक्सी ज्वना वयाः हाकिमं नारांचित धाल, ‘का बा झी साइन याय्त बैंकय् वने माःगु जुल । अथे जुगुलिं बायात का वयागु ।’
बैंकय् वनाः ब्वने मसःम्ह नारांचां सुम्क साइन यानाः छेँय् लिहाँ वल । बहनी म्हिग म्हिग स्वया थौं यक्व सितन नाप अय्लाः त्वंके हल ।
निम्ह चछि हे अय्लाः त्वना च्वन । सुथसिया निता इलय् निम्हं द्यं वन । कन्हय् खुन्हु नारांचा दं बलय् सुथसिया १० ता ई जुइधुंकल । छ्यं स्यानाः वास्या वास्या यायां दनाः वन ।
कलाम्हेसिया ख्वाः हे थपाय् पाः यानाच्वनाच्वंगु खनाः नाराचां हेपय् याय् थें धाल, ‘छाय् ले ख्वाः हासा पाय्पाः ? छु जुल ?’
‘कुने स्वः झासँ ले अले सिइका ।’
‘छाय् छु जुल ?’
‘व मालपोत कार्यालयया हाकिम ला थौं सुथय् हे बिस्युं वन नि ।’ कलाःया खँ न्यनाः व झसंग वन ।
ब्वाँय् ब्वाँय् वनाः कुने स्वः वंगु ला धात्थें हे कोठाया खापाय् तालं ग्वया तल । अय्नं नाराचां थःगु नुगः बल्लाकेत गनं वंगु जुइका धका तलय् थाहाँ वन ।
छन्हु धा धां निन्हू धाधां लांला फुतं नं व हाकिम लिहाँ मवः ।
मन मच्वनाः मालपोत अफिसय् वनाः स्व वन । अन च्वंपि मनूतय्के न्यना स्वःबलय् व नां दुपिं सुं नं हाकिम मदुगु खँ कन । नारांचा क्वाःलखं लूम्ह थें जुल ।
छेँय् वल मन मच्वन । त्वालय् च्वंम्ह छम्ह सःसिउम्ह किजा छम्ह ज्वनाः थम्हं साइन यानागु बैंकय् वनाः खँ सिइकेत वन । अन हाकिम नाप लाना स्वःबलय् गन छगु निगु लख खः करोडौं मल्याक ऋण कयातःगु जुयाच्वन । नापं व्याज छकः नं पुला मतःगुलिं नोटिस छ्वयाहय् त्यंगु खँ नं सिइकल ।
नारांचा आछु आछु जुयाः छेँय् गथे यानाः वनेगु धकाः विचाः यानाच्वन । त्वालय् च्वम्ह किजां वयात बल्ल बल्ल छेँ ब्वना यंकल । छेँ थ्यंका थः परिवारपिन्सं खँ फुक्क सिइका क्वातु क्वात । तर छु याय्गु नाराचां छु हे याय् मफुत ।
धा धा मधां बैंकया नोटिस वल, ‘धेबा याकनं पुलेसा पु मखुसा थ्व छेँ लिलाम यानाः सा धेबा म्हय् माल ।’
म्हिग म्हिग तक फाय्फुइँ याइम्ह नाराचां थौं चि नःम्ह खाचा थें जुयाच्वन । छुं हे याय् मफया आखिर बैंकया मनूतय्सं पुलिस ज्वनाः वया नाराचिया छेँय् तालं ग्वः वल ।
काय्पिन्सं माम्हेसित जक ब्वना गन वन, गन वन मसिइक वन । नारांचा याकःचा । न वयात छाय् ख्वया धाःपिं दु । न वयात सान्त्वना बिइपिं दु ।
नापनापं च्वंपि जःलाखःलातय्सं धयाच्वन, ‘थः मस्त, कला, त्वाःबाःयापिनिगु खँ न्यंगु जूसा थथे जुइ ला ? सु सु भतुवायात थः दय्कल जिल मखुला ?’
नारांचिया न्हाय्पनय् नं थ्व खँ थ्यन । बुलुहुँ वया तुति न्ह्यात । वं होस हे मदु । वना च्वन, वना च्वन । छथाय् तक्क दिना छचाखेरं स्वबलय् वला क्वय्ला गनेद्यःया नापच्वंगु ताँय् थ्यने धुंकूगु जुयाच्वन ।
तां क्वय् स्वल, द्यःयाथाय् मनूत द्यके वयाच्वंगु दु । देगलय् गं न्यानाच्वंगु सः ताय् दु । खुसि नं थः यथें न्ह्या वनाच्वंगु दु तर नाराचिया मन थातय् मला । वं वाचाय्के हे मफुत । मिखा तिसिना खुसि क्वब्वाःत ।
खुसिं चुइका यंका नाराचित गन यंकल सुनां मसिउ । त्वाः बाःयापिन्स थुलि जक सिउकि नाराचां तन । गन तन, गन तन ।