कीर्तिपुर सिंहदरवार र हेटौंडाबाट टाढा भयो – मेयर महर्जन
मेरो संवाददाता
कीर्तिपुर
कीर्तिपुर नगरपालिकाका मेयर रमेश महर्जनले कीर्तिपुर नगरपालिका काठमाडौंभित्रै रहेर पनि सिंहदरवार र हेटौंडाबाट टाढा भएको गुनासो गर्नुभयो । उहाँले विकास निर्माणका लागि कीर्तिपुरमा धेरै कामहरु गर्न बाँकी रहेको भए पनि प्रदेश र संघीय सरकारले जुन हिसाबमा बजेट उपलब्ध गराउनु पर्ने हो सो नभएकोमा ध्यानाकर्षण गर्दै यो कुरा बताउनु भएको हो ।
भौतिक पूर्वाधार तथा यातायात मन्त्री मा. बसन्त नेम्वाङले आज गर्नुभएको कीर्तिपुर नगरपालिकाको निरीक्षण भ्रमणका क्रममा उहाँलाई स्वागत गदै मेयर महर्जनले सो गुनासो गर्नुभएको हो ।
कीर्तिपुरमा मन्त्री नेम्वाङलाई नगरपालिकाका मेयर रमेश महर्जन, उपमेयर सरस्वती खड्का, पूर्वराज्यमन्त्री दिलिप महर्जन, नगरपालिकाका प्रतिनिधिहरु लगायतले कीर्तिपुर नगरपालिकाको नवनिर्मित भवनमा स्वागत गर्नुभएको थियो ।
निरीक्षण भ्रमणमा प्रतिनिधिसभाका सदस्य मा. कृष्णगोपाल श्रेष्ठ र मा. विणा श्रेष्ठको पनि सहभागिता रहेको निरीक्षण भ्रमण पूर्व भएको स्वागत कार्यक्रममा मन्त्री नेम्वाङले भन्नुभयो, ‘कीर्तिपुर नगरको नवनिर्मित भवनमा प्रवेश गर्ने पहिलो मन्त्रीका रुपमा आउन पाउनु खुसीको कुरा हो । कीर्तिपुरलाई स्मार्ट सीटीका रुपमा विकास गर्न जुन डीपीआर आज मलाई हस्तान्तरण गरेको छ, यसबाट कीर्तिपुरबासीहरु कतिको विकासप्रेमी छन् भन्ने कुरा दर्शाएको छ ।’
मन्तव्यका क्रममा उहाँले देशको भौतिक पूर्वाधार तथा यातायात क्षेत्रको विकासका लागि आफूले सक्दो कार्य गरिरहेको र यसका लागि साताका विदाहरुमा देशका विभिन्न स्थानहरुको अवलोकनमा गएर त्यहाँ भइरहेका कार्यको जानकारी लिने गरेको जानकारी दिनु भयो ।
उहाँले कीर्तिपुरमा विकासका लागि आफ्नोतर्फबाट सक्दो सहयोग गर्ने बताउनु भएको छ ।
स्वागत कार्यक्रमपछि मन्त्री नेम्वाङसहित सहभागीहरु कीर्तिपुर नगरपालिकाको चम्पादेवीस्थित पुष्पलाल पार्कमा पुगेर पुष्पलालको शालिकमा माल्यार्पण गर्नुभएको थियो ।
यसैगरी दीखुमा मा. मन्त्री नेम्वाङकै सहयोगमा निर्माण भइरहेको पूलको पनि उहाँले निरीक्षण गर्नुभएको थियो ।
यसैगरी मन्त्री नेम्वाङसहितको टोलीले कीर्तिपुरको रिंगरोड क्षेत्रको अवस्था, बाघभैरव मन्दिर परिसर र उमामहेश्वर मन्दिर परिसरको पनि निरीक्षण भ्रमण गर्नुभएको थियो ।
भ्रमणपछि समापन कार्यक्रमलाइ सम्बाेधन गर्नुहुँदै उपमेयर खड्काले कीर्तिपुरकाे वर्तमान अवस्था निरीक्षण गरीदिनु भएकाेमा सबैलाइ धन्यवाद ज्ञापन गर्नुभएकाे थियाे ।
समापनकै क्रममा कीर्तिपुर नगरपालिकाले सञ्चालन गरेकाे प्रशिक्षणका प्रशिक्षार्थीहरूले बाँसबाट निर्माण गरेकाे फ्रेम मायाकाे चिनाेकाे रूपमा प्रदान गरिएकाे थियाे ।
