वकील साहेबया ह‍त्या ब्वने धुंकाः

नेपालभाषा साहित्य ख्यलय् विजय कुमार श्रेष्ठ छम्ह मे च्वमिकथं म्हस्यूगु नां खः । वय्कःया लँय् वःम्ह मय्जु, म्ह स्वःसा भुतुचा नेपालभाषाया व उनैको लागि, जाली व एमपी फोर फर यू खस नेपाली भाय्या म्येचाः पिदने धुंकूगु दु । लिपांगु इलय् वय्कः न्हूगु विधा ज्वना पिलू झाःगु दु ( व खः उपन्यास ।
नेपालभाषा ख्यलय् जासुसी उपन्यासया म्होति दु । नेवाः ख्यलय् जासुसी उपन्यास धायेवं लुमनीगु नां राज साय्मि खः । वय्कःया पलाः ख्वाँय् लिना आः विजय कुमार न्ह्यलू झाःगु दु ।
ईलोहं प्रकाशनया लुखां सफू पिदनीगु खँ पिदनेवं हे थुगु सफू ब्वनेगु मनंतुना तिरिमय्जुं सफू बुकिङ यानादीगु खः । संयोग सफू न्हापां जिगु ल्हातिइ लात । जि नं उपन्यासया सौखिन जूगु ल्याखं लकडाउनया सदुपयोग यासें सरर ब्वना । मुक्कं ६० पौ जक दुगु उपन्यास सरर न्ह्याः । सफू ब्वने धुंकाः थुगु सफूयात कयाः छुं खँ च्वये हे मालीगु तातुनां थुगु च्वसु न्ह्याकाच्वना ।
साहित्यया दकले थाकुगु विधा मध्ये पद्यय् महाकाव्य व गद्यय् उपन्यासयात कायेगु याइ । पद्यय् महाकाव्य च्वयेबलय् छन्द, मात्रा व रस पूवंकेत यक्व मिहिनेत तुइगु जुयाः उकिया थासय् गद्यं घटनाक्रमयात मां हनाः न्ह्याकेगु निंतिं उपन्यासया सृजना याःगु धयागु धापु दु ।
उपन्यासया आधारभूत संरचनाया ल्याखं स्वयेबलय् व जिं न्हापा ब्वनागु थी थी उपन्यासय् उकथंया हे तत्वत लुइकागु दु । थुगु उपन्यास घटना वर्णनया पक्षं स्वयेबलय् गनं गनं ह्याकिं वंगु खः कि धया थें अनुभव जू ।
जासुसी उपन्यासया विशेषता हे धायेमाः कि उकी गुगुं न गुगुं कथं अपराध स्वानाच्वनी । थुगु उपन्यास नामं हे वकिल साहेबया हत्या लिसे स्वानाच्वंगु दु ।
उपन्यासय् छम्ह न्यायप्रेमी, देशभक्त, मृदुभाषी व लोकंह्वाम्ह वकिल गोपाल दास अमात्यया घटनालिसे स्वानाच्वंगु दु ।
उपन्यासया सुरु पुलिस स्टेशनय् फोन न्यागुलिं न्ह्याइ अले वकिल साहेबया हत्याराया पर्दाफाशलिसें बाखं क्वचायेका तःगु दु ।
भाषिक ल्याखं स्वयेबलय् बाखंया मां हना बांलाः । छगू निगू थासय् टाइप द्वना च्वंगुयात सामान्य हे धाये माः । तर पुलिस इन्स्पेक्टर व आईजीपी दथुइया खँल्हाबल्हा भचा अस्वभाविक खने दु । ज्याकुथिइ छम्ह उच्च तहया अधिकारीं तप्यंक इन्स्पेक्टरयात फोन याइगु गुलि स्वभाविक जुइ ।
मेखे अंग्रेजी भाय्या छ्यलाय् नं भचा विचाः यानाः याःसा बांलाइगु खः । गथे अंग्रेजी भासं नये त्वने याइगु थाय्यात ‘डाइनिङ्ग’ धाइगु खः । तर सफुतिइ मेगु हे खँग्वः छ्यलातःगु दु ।
पात्र वर्णन कथं हं । तर घटनाक्रम न्ह्यब्वयेगु झ्वलय् गुलिखे पात्रया उपादेयता व चरित्र चित्रण म्हो जूगु खः ला धया थें अनुभव जू । पात्र न्ह्यथने धुंकाः घटना व बाखनय् उमिगु भूमिका स्पष्ट जूसा अझ बांलाइगु खः । विशेषतः इन्स्पेक्टर विनयया केहेँया भूमिका पात्र म्हसीकेगु झ्वलय् छम्ह अनुसन्धान ग्वाहालि याइम्ह कथं न्ह्यथनातःगु दु । तर बाखनय् वया भूमिका धुकुमाः यायेगु बाहेक मेगु ग्वाहालि खने मदु ।
वकिलया न्हापा इहिपाः जुइ धुंकूगु व उम्ह कलाःलिसे नाप लाःगु खँ न्ह्यथनातःगु दु । वयापाखें दुम्ह काय्यात वकिलं हे ब्वनेत ग्वाहालि यानाच्वंगु दु । उम्ह काय्यात अबु स्यूगुया सुचं तकं बीगु आवश्यक मतायेकू । नेवाः समाजय् काय् दयेकं मेपिसं अन्तिम संस्कार याइगु चलन खने मदु । थुकिं मचायेक पात्रया हत्या जूवंगु दु ।
समग्रय् उपन्यासयात पाय्छिगु मध्यमस्तरया बाखंकथं नाले फु । च्वमिया थ्व न्हापांगु कुतः जूगुलिं नं थथे जूगु जुइफु । नेपालभाषा साहित्य धुकू जायेकेत वय्कलं लिपा लिपा नं थुकथं हे सृजना यानादी धइगु भलसा कयाच्वना । च्वमि व पिकाकयात सफलताया कामना ।
पिकाक ः ईलोहं प्रकाशन
मू ः २२५÷– तका