सुरजवीर बज्राचार्यको ‘हाकुमैंचा’ सार्वजनिक

संचारकर्मी एवं लोकप्रिय कलाकार सुरजवीर बज्राचार्यको नयाँ गीत ‘हाकुमैंचा’को म्युजिक भिडियो थिमिको प्यासिफिक फुड ल्याण्डमा आयोजित कार्यक्रममा लोकार्पण गरिएको छ । आफ्नो प्रियालाई जुनसुकै शर्तमा पनि आफ्नो जीवनसाथी बनाउने संकल्प भाव रहेको नेपालभाषाको यो गीत मध्यपुर थिमि नगरपालिकाका मेयर मदनसुन्दर श्रेष्ठले लोकार्पण गरेका हुन् ।

कार्यक्रममा मेयर श्रेष्ठले नेपालभाषामा निर्माण गरिएको गीतलाई व्यावसायीकरण गर्नुपर्नेमा जोड दिँदै सांगीतिक अभिव्यक्तिलाई जुनसुकै समुदाय, वर्ग  र भाषामा बनाएर अन्तर्राष्ट्रियकरण गर्न सकिने बताए ।

गीतको म्यूजिक भिडियोले विभिन्न ऐतिहासिक, सांस्कृतिक महत्वका स्थानहरुको प्रचारमा समेत योगदान पुग्ने बताउँदै स्थानीय नेपालभाषालाई सम्बर्द्धन गर्ने गीत, संगीतमा आफ्नो पनि सहयोग रहने प्रतिवद्धता ब्यक्त गरे ।

लोकार्पण कार्यक्रममा रचनाकार तथा गायक सुरजवीर बज्राचार्यले प्यारोडी गीतका रुपमा सृजित ‘हाकु मैंचा’ले आफ्नो मौलिक रुप पाएको उल्लेख गर्दै संगीतकार जुगल डंगोलको साथले नवरुप प्राप्त गर्न सफल भएको बताए ।
‘हाकुमैंचा’ म्यूजिक भिडियो बालमुकुण्ड प्रजापतिको निर्देशनमा तयार भएको छ भने देवेन्द्र प्रजापतिको छायाँकन एवं सम्पादन रहेको छ ।
नेपाल सांस्कृतिक उत्थान परिषद्को व्यानरमा तयार भएको म्यूजिक भिडियोको मुख्य भूमिकामा अनु खड्का, रमेश बल्ल तथा आशाराम शिल्पकार छन् भने कलाकारहरु डेरिका छन्त्याल, आरती भासिमा, अस्मिता मानन्धर, लिजा तथा निशा प्रजापतिको समेत साथ रहेको छ । दिपक बज्राचार्य र सागर बनमालाको संयुक्त कोरियोग्राफी, आशा तामाङको श्रृंगार रहेको यस म्यूजिक भिडियो निर्माणमा महेशप्रकाश हाडाले ब्यवस्थापन गर्नुभएको हो ।
हामी दुई किनार, अस्वीकृत माया, ग्यानापु स्टाइल, बुदिंया भिंतुना लगायत गीतबाट चर्चा कमाउनु भएका बज्राचार्यले ‘तसकं यःम्ह’ गीतबाट सर्वोत्कृष्ट गायक नेपालभाषा स्टार म्यूजिक भिडियो अवार्ड’ र अन्तर क्याम्पस गीत प्रतिस्पर्धामा समेत सर्वोत्कृष्ट गायकको अवार्ड जितिसक्नु भएको छ ।  गायक तथा रचनाकार बज्राचार्य नेवाः पत्रकार राष्ट्रिय दबूको केन्द्रीय अध्यक्ष पनि हुन् ।