यःम्ह भौ

प्रभा व प्रकाश नाप लाःगु नं तःदँ दय्धुंकल । आः ला छेँय् नं ब्याहा याय्गु खँ ल्ह्वना हल । उकिं थः परिवारयात थःपिनि खँ सुचुका मतसे दक्व खँ कन । परिवारपाखें नं फाय्गु स्वयां निम्हेसित हे ब्याहा याना बिउसा बांलाइ तायेकल । खँखि ल्हानाः ब्याहा क्वःछित । प्रभा भमचा जुयाः दुहाँ वल । तःधिकःम्ह भौ जूगुलिं छेँया दक्व ज्या सिधयेके माःगु वया कर्तव्य जुल । वयात छम्ह भौ जुयाः व छेँया सेवा याय्गु कर्तव्य कथं काकां वन ।
भाःतया छेँय् माजुबाःजु किजाभत व केँहेभत यानाः यक्व मनूत दुगु मखु । केहेँभतया ला नापं हे व्याहा जूगु । गबलें गबलें वइम्ह केँहेभत नं पासा थें जुयाच्वन । खँ दक्व ब्याः । गबलें गबलें खतपत मजूगु ला मखु, भौमचाया हैसियत प्रभां सह यानाः परिवार मिले हे जुयाच्वन । छन्हु धाधां निन्हु धाधां किजाभतम्ह नं तःधिक जुल । वया नं मिसा पासा दत । छन्हु वया नं ब्याहा याय्गु ई जुल व्याहा याय्गु निंतिं खँ ल्हाय्गु शुरु जुल । मिसा मचा बांलाः । बानि चानि नं बांलाः व स्वयां नं वया दाजुकिजा सुं हे मदु ।
धनसम्पत्तिया नामय् स्वखा प्यखा छेँ दु, बुँ च्यापीझिपी । थथे जाम्ह भौमचा लाय त्यंगुलिं माजुया तुति थातय् मलाः । कल्पना यायां गन गन थ्यनीगु ।
छन्हु धाधां निन्हु धाधा किजाभतया व्याहा नं जुल । जब ब्याहाः सिधल माजुया पहः हे मेगु जुल । व भौमचायात थुलि माया यात कि छुं नं ज्या याय् म्वाः भउजु दु नि वं याइ । छ सुम्क जक च्वना छं फुगु चाःगु ज्या जक या धकाः तयातल ।
थुलि जक मखु भतिचा म्हं मफु धाःसां चिया कोठाय् हे यंकाः बिइ यंकीगु तर प्रभा मफु धाःसा भौमचा जुयाः न्हासं चुयाः सां ज्या यायेमाः धकाः तिंतिं न्हुयाः ब्वः बियाः ज्या याकीगु ।
छन्हु प्रभा इपांथिपां मदय्क मफुत । माजुया पहः वहे । सह यानाः सह याय् मफयाः थः छेँय् खबर छ्वत । मांम्ह वयाः काः वल । माजुया पालिंनिसें तं पिहाँ वः ।
थन ज्या दक्व अथें तयाः गुलि थ छेँय् चाहिउ वने माःगु धकाः मांम्हेसित हे न्यंका छ्वत । मांम्हं थः म्ह्याय्या अवस्था स्वय् मफयाः निन्हु प्यन्हु तया हये धकाः यंकल । थः छेँ थ्यंकाः वास नलं नं वया ज्वर वःगु क्वमलाः । छु जूगु छु जूगु डाक्टरं वासः बिलं नं वया रोग क्वमलाः । छवा दय्काः माजुम्हं का वल । छेँ पुजा दु भौ मन्त कि सकस्यां न्यकी उकिं का वया धकाः ब्वना यंकल ।
प्रभां वने न्ह्यः ज्वर नापे यात १०२ ज्वर दु । दनेत स्वल इकुसे च्वं दनेहे मफु । तर नं वं माजुया बचन तयाः लिसें लिहाँ वन ।
कन्हय् खुन्हु क्वसः दुम्ह भौमचायात दना वय् म्वाः धकाः थ्यना तल ।
प्रभा ज्वर दुम्ह थरथर खाःम्हेसित ज्या मयासे गाः ला धकाः दक्व ज्या याका तल । वया मनमनं यक्व हे नुगः ख्वल । प्रकासं नं दक्व स्वया च्वन । मां बौयात छुं धाय् मफु । तर कलाया अवस्था खनाः वया नं थौं नुगः ख्वल ।
पुजा सिधल भाडा भिडा सिलेगु नं प्रभां हे यात । ग्वाहालि सुं हे मदु । न्हापा लिपा सा केहेँभत वइगु खः । आः थौंकन्हय् व नं भौ व मांया पँ लिना जुइगु जुल ।
दक्व ज्या सिधयेका प्रभा बेहोस जुल । प्रकासं अस्पताल यंकेत कुतः यात तर मांम्हं छुं जूगु मखु भचा जाल कि होसय् व हे वइ नि धकाः न्वात । तर प्रकासया मन मच्वं । अस्पताल यंकल डाक्टरं प्रकासयात मारि ब्वः बिल । थपाय् सकं जुइ धुंकाः नं छु स्वया च्वनागु भचा लिपा लाःगु सा सिइगु का । प्रकास लाता थें जुल । वयात वयाय् थ्वयाय् मन्त । धेबा थःयाके दुगु भचा भचां गाइला मगाइला ।
डाक्टरं प्रभायात भर्ना काल । चछि दुहाँ मवःबलय् माम्हं फोन यात । अस्पतालय् भर्ना काल धकाः सिइकाः स्वः वन । अन नं म्हुतु बेबे क्वय्का ज्या याय् मालि धकाः मफु धका बाहना तःगु धकाः हाला च्वन ।
प्रकासं माम्हेसित अन मतसे छेँय् छ्वया बिल । बल्ल बल्ल लन । छेँय् यंकेगु दिं वल । प्रकासया मन मच्वं । छेँय् यंकल कि थ्वयात ज्या मयाकुसे तइ हे मखु छु याय्गु ? वं पासा नाप सल्लाह यात । मिले जूम्ह पासां न्हापा छेँय् नि यंकि, छुं जुल धाःसा जिं कोठा मिले याना तय् छ अन हे वा धकाः धाल ।
प्रकासं बिचाः याः थें हे जुल । प्रभा छेँय् मथ्यनि ज्या ब्वय्गु सुरु जुल । प्रकासं प्रभाया ल्हाः ज्वनाः त्व हे मत्वःतू । वं खापाय् चुकु तया खापाय् तुं दना च्वन । प्रकासया नुगः थौं झन ख्वल । गुलि हिसि दुम्ह प्रभायात जिं रानि यानाः तय् धकाः ब्या यानागु तर थन नोकरानि थें जुल धकाः । प्रभाया ख्वाः तुंक स्वल ।
न्हापा थें ख्वाः चमकं ख्वालय् न्ह्यसः जाय्क दु । ‘जिं अपराध यानाः छं थन हयाः जितः थजागु जिन्दगी बिया धकाः न्ह्यस न्यं थें जुल प्रकासयात । ब्वाँय् वनाः घय्पुनाः ह्वाँय्ह्वाँय् ख्वल प्रकास । थ्व खनाः प्रभां छुं हे मथु । थः नं प्रकासयात घय्पुना भचा ख्वय्का तल । अले न्यन । प्रकासं लुधंक ख्वाः स्वयाः धाल, ‘जिं अपराध याये लात । छुं हे मस्यूम्ह छन्त जिं रानि याये धकाः हया नोकरानि थें याना तया ।’
प्रभां धाल अथे मखु प्रकास छं दः मायाय् कमि ला याःगु मदु । परिवार धैगु सकस्यां दइ व परिवारय् थथ्याक्वथ्या जुया ला च्वं हे च्वनी । उकि सह याना च्वं ख्वय् मते धकाः हय्कल ।
पलख लिपा प्रकास खापा चाय्काः पिहाँ वन । भचा जाय्का दुहाँ वल । प्रभायात तीजक थन । खापाय् पिनं चुकू तया विस्तारं पिहाँ वन । अले पासां डेरा कया तःथाय् वन । अन वं पासाया ग्वाहालिं लासा फागां व नय्त छुं भतिचा न्याना तया तःगु खन ।
प्रकासं धाल, ‘जिं छन्त आः यक्व दुःख बिइ मखु । झी थन हे दुसा साक्क मदुसा क्वाःलः जक त्वनाः सां च्वनेगु’ धकाः धाः बलय् प्रभाया मिखां धररर ख्ववि हाल । तर नं छुं मधाः ।
काय् भौ छेँ नं पिहाँ वंगु सिइकाः माजुम्ह तं चायाः म्हुतुइ वक्व म्हुतु ल्हात ।
दिं बिना वन । छन्हु माजुम्ह तसकं विरामी जुल । प्रभा पिहां वसांनिसें छेँ ज्या दक्व माजुम्हं यानाच्वंगु । आः सुनां याइगु भौया बानि स्यने धुंकल । लिबाक दनेगु कोठाय् बेड टी त्वने माःगु । माजुम्ह बिरामी जूगु स्वयाः ज्या याइपिं सुं मदु धका व नं थः छेँय् वनाः चाहिउ वन । आखिरय् छेँ ज्या बौम्हसिया छ्यनय् वल । काय्म्ह अफिस वने माःम्ह । व सुथ न्हापां दनाः ससलय् वनाः जा नइ । अले अनं तुं अफिस वनीगु । छेँ ज्यानिसें कलाःम्ह मफुम्ह स्वय्गु ज्या यायां दिक्क चाल । अबले प्रभायात यक्व लुमंकल ।
काय्यात छकः फोन यात । प्रभा ब्वाँय्ब्वाँय् वयाः माजुम्ह स्वः वल । न्हिंन्हिइ छेँ ज्यानिसें बिरामी माजुया सेवा यात । माजुम्ह याकनं रोग लन । अले हानं व हे सुका व हे मुलु धाः थें नानि देखि लागेको बानि । प्रभायात हेबय् चेबय् याय्गु सुरु जुल ।
प्रकासं आः धाःसा मांयात न्वात । वं छन्त मांया रुपय् कया सेवा यात तर छं वयात भौ जक स्वल । आवलि छुं जूसां प्रभा थ्व छेँ दुहाँ वइमखु धकाः प्रभाया ल्हाः ज्वनाः साला यंकल ।