अबुया ख्वाः स्वय्गु

श्रृजना महर्जन
नेवाःत तजिलजिइ तःमिपिं खः । नेवाःतय्सं लय् छगू नं छगू नखःचखः हनावया च्वनीगु जुगुलिं हे हलिमय् नेवाः तजिलजि च्वजाः । थुलि जक मखु नेवाःत प्रकृति पुजारी नं खः । नखःचखः हनेगु झ्वलय् गुंलागाः औशी खुनु अबुया ख्वाः स्वय्गु नं छगु खः । झीत “अबु” खँग्वः जक न्यने मात्रनं नुगः सिचुसे च्वं, याउँसे च्वं । झीत मां नं जन्म बियालिं कर्म खंका ब्यूम्ह जुगुलिं अबु नामं हे तिबः वइगु । अथेहे तुं अबुं आखः ब्वनेत माःगु खर्च जुटे यानाः थः मस्तय्त सक्षम दय्का बी । अबुयात हिन्दू धर्मय् गुरु, रक्षक व पालनकर्ताया कथं कयातःगु दु । थ्वहे कथं संसारय् मां अबुसियां तःधंपिं सुं मदु धाइगु खः । धर्मशास्त्रया कथं “मातृ देवो भवः, पितृ देवो भवः” धाय्गु याः । थुकथं थः मां अबुयात धर्मशास्त्रय् नं द्यः भापिया तःगु खनेदु । अबुया ख्वाः स्वय्गु यात कुशे औंशी, पितृ तर्पणी औंशी वा गोकर्ण औंशीया कथं नं धाय्गु याइ ।
सदां झीसं अबुयात हनावया च्वंसां तबि दछिया छन्हू झीसं “अबुया ख्वाः स्वय्गु” धकाः हना वयाच्वनागु दु । अबुयात मान सम्मान याय्गु कथं ख्वाः स्वय्गु याइ । थ्व न्हि अबुया ख्वाः स्वय्गु विशेष न्हिकथं काय्गु याइ । संस्कारकथं अबुया ख्वाः स्वय्गु न्हापा नेवाःतय्सं हनावयाच्वंगु खः लिपा वया मिडियां आपा प्रचार जुसेंलि मेमेगु जातितय्सं नं थुकियात नालाः अबुया ख्वाः स्वय्गु हनेगु यात । नेवाः संस्कारकथं अबुया ख्वाः स्वय््गु न्हिकथं गुंलागाः आमै भाद्र कृष्ण आंैसीकुन्हु थः काय्म्ह्याय्पिंसं अबुया ख्वाः स्वय्गु याइ । थः अबुयात खेँय् सगं बियाः, साःगु भिंगु मरिचरि बियाः तःजिक हनेगु याइ । अथेहे तुं इहिपा याय्धुंकुपिं म्ह्याय् मस्तय्सं थः छेँय् वया अबुया ख्वाः स्वः वइ । थौं वया थ्व नसात्वंसाय् परिमार्जित जुयावंगु कथं इहिपा याःगु दँय् तःजिक मरिचरि, साःगु भिंगु सिसापुसा ज्वलं, अय्लाः, थ्वँ व थी थी परिकार यक्व हया अबुया ख्वाः स्वइ धाःसा लिपाया दँय् ख्वाः स्वः वइ अय्नं न्हापाया थेँ उलि तःजिक थी थी परिकार हय्गु याइ मखु omg ।
अथेहेतुं अबु दिवंगत जुइ धुंकुपिं काय्म्ह्याय्पिं धाःसा म्वः ल्हुया नीसी यानाः गुरुजुयात अबुया नामं निसलाः बियाः अबुयात श्रद्धा यानाः लुमंकी । थ्व न्हियात गोकर्ण औँशी नं धाय्गु याः । थ्वकुन्हु अबु मदुपिं काय्पिंसं गोकर्ण तीर्थय् वना श्राद्ध याय्गु नं चलन दु । उत्तर गंगा नं धाइगु गोकर्ण खुसिइ वना श्राद्ध याय्वं दिवंगत पितृ तरे जुइ धयागु जनविश्वास दु । बौद्ध धर्मया कथं गोकर्ण तिर्थ १२ गू तिर्थ मध्ये छगू तःधंगु तिर्थ नं खः । गोकर्णय् सूर्यमति, चन्द्रमति व बागमति स्वाःगु ह््वंगः (त्रिवेणी) व गोकर्णेश्वर महाद्यः दुगुलिं छगू महत्वपूर्णया तिर्थकथं हनेगु याः । पौराणिक आख्यानकथं भारतया गयायात दक्षिण गया व नेपाःया गोकर्णयात उत्तर गया धाइगु खः । थथे अबु मदुपिं काय्पिंसं गोकर्णय् वनाः श्राद्ध याइगुलिं गोकर्ण औशी धाय्गु याः ।
अथेहेतुं अबुया ख्वाः स्वय्गु कथं श्राद्ध याय्बलय् कुशं पतिंचाय् चिनाः तर्पण याय्माःगु जुया थ्व कुन्हुयात कुशे औशी नं धाइ । थौंया न्हिकुन्हु थाय् थासय् कुश मियातःगु दइ । अथेहे थ्वकुन्हु छेँ कुश हयाः तल धाःसा छेँ बाँलाइ, भिंजुइ धइगु जनविश्वास दु । सूर्यग्रहण व चन्द्रग्रहण जूगु इलय् ग्रहणं थिउगु लः त्वने, छ्यले मजिउ धयागु चलन दु । अय्नं ग्रहणया इलय् कुश लखय् थुनातल धाःसा लः शुद्ध जुइगु व त्वने नं जिउ धयागु जनविश्वास दु । कुशयात विष्णुया कथं मान्यता बियातःगु छगू घटनाया कथं काय्बलय् स्वस्थानी पुराणय् महाद्यः व जालन्दरया दथुइ युद्ध जुबलय्, महाद्यवं जालन्धरयात बुके थाकुया च्वंगु खँ जालन्धरया कलाः वृन्दाया सतित्व खः धकाः थुइकल । उकिया कथं वृन्दाया सतित्व भंग याय्माःगु जुल । जालन्धरया कला वृन्दाया सतित्व भंग याय्त विष्णुं छल याय्त जालन्धरया भेष कया जालन्धरया कला वृन्दाया थासय् वना सतित्व भंग यात । अनं लिपा विष्णुं थःगु म्हसिका बियाः वास्तविक रुप क्यन । विष्णु थथे छल यानाः थःगु सतित्व भंग याना बिउगुलिं वृन्दां विष्णुयात “छ घाँय्, झार, सिमा व ल्वहं जुया च्वनेमाः” धकाः सरा बिउगुलिं घाँय् कथं कुश जुगु व झार सिमा व ल्वहं कथ तुलसी, वंगल सिमा व शालिग्राम जूगु खः धइगु जनविश्वास दु । थुकथं श्राद्ध याइबलय् कुशयात विष्णुया रुपकथं नालाः कयाः पतिंचाय् चिनाः विष्णुयात नं साक्षी तयाः श्राद्ध याय्गु चलन दु । थथे जुगुलिं यानाः गोकर्ण औशीयात कुशे औंशी नं धाय्गु याः ।