ची धुन मतिनाया गथः
सुनां नं गुबलें फ्यने हे मफयेक
ची धुन मतिनाया गथः झीसं
अय्नं चबुना स्वब्याई धकाः,
धन्दा वया च्वनीगु थ्व मनसं ।
नःलिगु मतिनाय् महिता लाखे
हुलीगु जुयाच्वन स्वःस्वःथाय्पाखे
झ्यालिंचित थें लिउगु ब्यलय्
बिस्यूं वना झी अजूगु ख्यलय्
पल्पसा त्व त्वं ग्वय् फसं लिउगु
इपां थिपां मदु निम्हं ब्वाँय् वनागु
उथाय् सुपाँय् ह्वतं निभाः पिज्वःगु
फुल्फुल ससिवां लाय्लामा त्वःगु
स्वस्वं लोंफातय् झासु लनागुु
छझा उकि हे ल्वहंपौ कियागु
व दसि नुगलय् सुचुकाः तैगु
सिइ ताइ भनं म्ह क्वाना वैगु
पलाः न्ह्यज्याइ आः लिफः मस्वसे
दिग्मिगी भुखाय्् ब्वःसां, खुसि थें
थलाः क्वलाः छ्वाःया पर्वाह मयासे
ह्वने झी जन्मकाछि, ला व लुसिथें ।
