जिगु मिखाय् लक्ष्मण सर

प्रेम मोहन सिरपा गुथि नीस्वनेगु झ्वलय् दकले न्हापां थ्व सिरपाःया दुजः फुक्क मुनेगु क्वःछित । अले थ्व सिरपाःया दाता भाजु ई. मोहनकृष्ण डंगोलं गन मुने धकाः बिचाः यानादीबले सकसितं पाय्छि जुइगु थाय् नेवाः देय् दबूया ज्याकुथिइ मुनेगु खँ जुल ।
फुक्कसित न्हिनसिया २ ताः इलय् मुनेगु सुचं वःकथं जि नं अफिसय् छुट्टि कयाः थ्यंकः वना । जि भचा लिबात, दुजःपिं सकलें थ्यने धुंकल ।
जि नं बुलुहुं दाताया नापं च्वंगु मेचय् फ्यतू वना । थय्क फुक्कसित मिखा ब्वयाः स्वया । सकलें छम्ह थें छम्ह दिग्गज व्यक्तित्वपिं मुनाच्वंगु । उकी मध्ये छम्ह अतिकं हनेबहःम्ह शिक्षा ख्यलय् नांजाःम्ह वय्कःया नां धाय् मात्र नं सकसिनं शिक्षा ख्यलय् छगू परिवर्तन लुमनी, जिं न्हापा हे म्हस्यूम्ह लक्ष्मण सर नं खना ।
अन दुपिं सकलें हे नांजाःपिं खः, सुं नं म्हसीका बियाच्वनेमाःपिं मखु । सिरपाःया लागि माःगु विधान दय्केत सहलह ब्याका । मुँज्या क्वचाय्काः दाताभाजुं मुँज्या भत्ता बीगु खँ न्ह्यथनादिल ।
थ्व खँ न्यनाः लक्ष्मण सरं धयादिल, ‘मोहन दाइ ! थ्व सिरपालय् गुलि नं दुजःपिं दु सुइत नं थ्व भत्ता बीमाःगु जरुरी मखना । थ्व सिरपाःया लागि जिमिसं माःगु, फुगु छितः ग्वाहालि याय्गु बचन बिइ ।’
लक्ष्मण सरं बियादीगु थुगु बचन कथं वय्कःया जीवन दत्तले फुगु, माःगु सरसल्लाह बियाः ग्वाहालि यानादिल । प्रेम–मोहन सिरपाया न्हापांगु सिरपा असार १५ गते वय्कःया सिद्धार्थ बनस्थली स्कूलया हलय् सम्पन्न जुल ।
वय्कःयात लुमंकेबलय् मेगु छगू घटना नं जितः लुमंसे वइ । थ्व हे सिरपाःया सिलसिलाय् दुजःत मुनेगु झ्वलय् छकः आशा सफूकुथिइ मुनाच्वनागु । दुजःपिं सकलें मथ्यंनिगुलिं थवंथवय् सहलह ब्याकाच्वना । व इलय् आशा सफूकुथिइ छम्ह नकतिनि साहितय ख्यलय् पलाः तयादीम्ह साहित्यकारनाप वय्कः खँ ल्हानाच्वनादिल । लक्ष्मण सरं वय्कः साहित्यकारयागु फुक्क खँ जिउ, बांलाः थथे हे यानादिसँ धकाः फुक्क खँ बांलाः धयादिल ।
जि भचा अजू चाया छाय्धाःसा छुं नं साहित्य अथवा छुं नं खँ फुक्क बांलाःगु जक जुइमखु, छुं न छुं मिलय् याय् माःगु दइ । तर लक्ष्मण सरं वय्कःयात फुक्कं बांलाः धकाः धयादिल ।
थ्व खँ जिगु मनय् गोलमाल यात । लिपा वय्कः साहित्यकार वने धुंकाः जिगु नुगःया खँ सरयात न्यना बले लक्ष्मण सरं धयादिल, ‘सुनां नं छुं नं याय् त्यंगु ज्या वा साहित्यया सृजनायात न्हापा हे कुंखिन धाय्व वया हौसला सिना वनी । उकिं छुं नं न्हूगु सृजनायात बांलाः धकाः हौसला बिब्युं याका यंकेमाः । बुलुहुं व सुधार जुजुं वइ ।’
शिक्षा व साहित्यया ख्यलय् लक्ष्मण सरं म्हितादीगु भूमिकायात नेपाःमिपिसं गुबलें नं ल्वःमंके फइमखु । वय्कःलिसे प्रेम–मोहन सिरपाः गुथिया ज्याखँय् निरन्तर सहलह जुयाच्वंगु खः । थुलि जक मखु वय्कलं संविधानसभाय् म्हितादीगु भूमिका, नेपालभाषाया बाखं साहित्य थपुया निंतिं म्हितादीगु भूमिकायात नं सदां लुमंके बहः जू ।